बडोदा – गुजरात विधानसभा निवडणूक जाहीर होण्यापूर्वीच येथे नेत्यांच्या दौऱ्यांनी वातावरणात रंगत आणली आहे. राहुल गांधी सोमवारपासून गुजरातच्या दौऱ्यावर आहेत. आज त्यांच्या दौऱ्याचा दुसरा दिवस आहे. काँग्रेस उपाध्यक्षांनी राष्ट्रीय स्वयंसेवक संघाला (RSS) महिला विरोधी म्हटले आहे. ते म्हणाले संघाच्या शाखांमध्ये फक्त पुरुषांना प्रवेश असतो तिथे तुम्ही कधी महिलांना शॉर्ट्समध्ये पाहिले आहे का? राहुल गांधींनी अमित शहांचे चिरंजीव जय शहांच्या निमित्ताने मोदी सरकारवर निशाणा साधला आहे.
राहुल गांधी म्हणाले, ‘भाजपची विचारधारा ही महिला विरोधी आहे. महिलांनी शांत राहावे. त्या जोपर्यंत तोंड उघडत नाही तोपर्यंत यांना मान्य असतात. त्यांनी बोलण्यास सुरुवात केली, प्रश्न विचारले की हे (भाजप विचारधारेचे लोक) त्यांना चूप करतात. यांची मुख्य संघटना आरएसएस आहे. आरएसएसमध्ये किती महिला आहे, माहित आहे का? त्यांच्या शाखांवर कधी महिलांना शॉर्टस घातलेले पाहिले का? मी तरी अजून पाहिले नाही.’
‘मोदी फक्त सेल्फीची मजा घेत आहे’
– राहुल गांधींनी मोदींवर निशाणा साधताना म्हटले, ‘तुम्ही (मोदी) फक्त सेल्फीची मजा घेत आहेत. मात्र या फोनने चीनी युवकांना रोजगार मिळवून दिला आहे. हे फोन मेड इन चायना आहे. मोदींचा फोकस रोजगारावर नाहीच.’
शहांचा मुलगा स्टार्टअप इंडियाचा आयकॉन
– अमित शहांचा मुलागा जय शहाच्या कंपनीला गेल्या दोन-तीन वर्षात झालेल्या फायद्यावरुन राहुल गांधींनी त्यांना स्टार्ट अप इंडियाचा आयकॉन म्हटले आहे.
– ते म्हणाले, ‘तुम्हाला स्टार्ट अप इंडिया माहित आहे का? स्टार्ट अप इंडियाचा आयकॉन जय शहाबद्दल तुम्ही ऐकले आहे का? मात्र भारताचे ‘चौकीदार’ यावर मौन बाळगून आहेत. त्यांना अशा गोष्टींबद्दल बोलायला आवडत नाही.’
विकास थापा ऐकून वेडा झाला…
विकास वेडा झाला आहे, या वक्तव्याचा पुनरुच्चार काँग्रेस उपाध्यक्ष राहुल गांधी यांनी सोमवारी केला. गुजरातच्या खेडा येथे बोलताना ते म्हणाले, गुजरातमध्ये विकास थापा ऐकून ऐकून वेडा झाला आहे. सोमवारपासून ३ दिवसांच्या दौऱ्यावर आलेल्या राहुल गांधी यांचे सोमवारी अहमदाबादेत आगमन झाले. गेल्या १० दिवसांतील हा त्यांचा दुसरा गुजरात दौरा आहे. गेल्या वेळी ते २६ ते २८ सप्टेंबर दरम्यान सौराष्ट्रातील ५ जिल्ह्यांच्या दौऱ्यावर होते. या वेळी ६ जिल्ह्यांचा दौरा करणार आहेत.
खेडा येथील सभेत बोलताना राहुल गांधी यांनी ‘जीएसटीमध्ये लहान व्यापारी दर महिन्याला ३ फॉर्म कसे भरणार?’ असा प्रश्न उपस्थित केला. ते म्हणाले, एका प्रश्नाचे उत्तर न देता मोदी यांनी नोटाबंदी केली. लहानातील लहान मुलगाही यामुळे झालेले नुकसान सांगेल. आमचे दुकान रोख व्यवहारावर चालते, असे तो म्हणेल. गुजरातेत काँग्रेस सत्तेवर आली तर आम्ही ‘मन की बात’ करणार नाही. तुमच्या मनातील गोष्ट ऐकून घेऊ. सध्या देशासमोर सर्वात मोठे आव्हान रोजगाराचे आहे. एक दिवसात चीनमध्ये ५० हजार लोकांना रोजगार मिळतो तर आपल्याकडे ४५० तरुणांना रोजगार मिळतो. आपल्याकडे लहान दुकानदारांपासून रोजगार मिळेल. मध्यम व्यवसाय व शेताजवळ फूड प्रोसेसिंग युनिट बसवल्याने रोजगार मिळेल. मोदी सर्व मदत केवळ १० ते १५ उद्योजकांना करतात, असा टोला त्यांनी लगावला.
गुजरात मॉडेलवर टीका
राहुल गांधी म्हणाले, नरेंद्र मोदी यांचे गुजरात मॉडेल कसे आहे? पैसे असतील तर नोकरी मिळेल, पैसा असेल तर जमीन मिळेल, अारोग्यसुविधा मिळतील. पैसे नसतील तर तुम्ही (जनता) खड्ड्यात जा. मोदींचे गुजरात मॉडेल फेल गेले आहे. आम्ही लहानसहान कामेही तुम्हाला विचारून करू, असे आश्वासन देतानाच ते म्हणाले, गुजरातच्या लोकांना गुजरात मॉडेलची कल्पना आली आहे. अनेक वर्षांपूर्वी आणखी एक गुजरात मॉडेल होते. त्याने धवल क्रांती आणली. शेतकऱ्यांना बळकटी दिली. आम्ही पुन्हा तेच मॉडेल आणू.
सौराष्ट्रात बैलगाडी मिरवणूक आणि चाय पे चर्चा :
२६ ते २८ सप्टेंबरदरम्यान पहिल्या दौऱ्यात राहुल गांधी यांनी द्वारकाधीश मंदिरात पूजा केली. व्हिजिटर्स बुकमध्ये वडील राजीव गांधी व आजी इंदिराजी यांचे संदेश वाचून ते भावुक झाले. सौराष्ट्रातील एका गावात ते बैलगाडीतून गेेले होते. तेथे चाय पे चर्चा झाली.
