सलेम : तामिळनाडू आणि कर्नाटकमधील ३० बलात्कार आणि १५ हत्यांच्या गंभीर गुन्ह्याप्रकरणी शिक्षा भोगत असलेला कैदी एम. जयशंकरने तुरुंगातच आत्महत्या केली आहे. याप्रकरणी तुरुंग प्रशासनाने चौकशीचे आदेश दिले आहेत.
बंगळुरू येथील परप्पन अग्रहरा तुरुंगात जयशंकर शिक्षा भोगत होता. तुरुंगातील दाढी करण्याच्या तुटलेल्या ब्लेडने गळ्यावर वार करून त्याने आत्महत्या केली. रात्री २ वाजून १५ मिनिटांनी काही कैद्यांनी त्याला रक्तबंबाळ अवस्थेत पाहिले आणि पोलिसांना त्याची खबर दिली. डॉक्टरांनी त्याला तपासून जिल्हा रुग्णालयात भरती करण्यास सांगितले. त्यामुळे त्याला बंगळुरूच्या व्हिक्टोरिया रुग्णालयात दाखल करण्यात आले असता त्याला मृत घोषित करण्यात आले. तुरुंगात शिक्षा भोगत असताना तुरुंगाची भिंत तोडून तो पळाला होता. ५ सप्टेंबर २०१३ रोजी त्याला पुन्हा अटक करण्यात आली होती. त्याने एका नाव्ह्याचे ब्लेड चोरले होते, असं तुरुंग प्रशासनाने पोलिसांना सांगितलं. दरम्यान, गळ्यावर वार करून घेताना त्याला कुणीही पाहिलं नसल्याचं सूत्रांनी सांगितलं.
ट्रक चालक असलेला जयशंकर हा शंकर या नावानेही ओळखला जायचा. तो महिलांना एकटं गाठून त्यांच्यावर बलात्कार करायचा आणि पुरावा राहू नये म्हणून त्यांची हत्या करायचा. २३ ऑगस्ट २००९ मध्ये कॉन्स्टेबल एम. जयमणी यांची हत्या आणि बलात्कारानंतर तो पोलिसांच्या रडारवर आला होता. जयमणी या तत्कालीन उपमुख्यमंत्री एम.के. स्टालिन यांच्या दौऱ्यासाठीच्या सुरक्षा व्यवस्थेत तैनात होत्या. १९ ऑक्टोबर २००९ रोजी पोलिसांनी त्याला अटक केली होती. त्याची कोईम्बतूर तुरुंगात रवानगी करण्यात आली होती. मात्र त्याचं रेकॉर्ड तपासलं असता त्याने १३ बलात्कार आणि खून केल्याचं पोलिसांच्या निदर्शनास आलं होतं.
१८ मार्च २०११ मध्ये धर्मपुरी जलदगती न्यायालयात नेत असताना पोलिसांच्या तावडीतून पळून जाण्यात तो यशस्वी ठरला होता. त्यानंतरही त्याने बलात्कार आणि खूनाचं सत्र सुरूच ठेवलं होतं. मात्र तो जास्त काळ पोलिसांना गुंगारा देऊ शकला नाही. पोलिसांनी त्याला ४ मे २०११ रोजी बिजापूर येथून ताब्यात घेतले होते.
अबब्…!३० बलात्कार, १५ खून करणाऱ्या कैद्याची आत्महत्या!
