गुजरात: नवसारी येथे भीषण अपघातात ९ ठार, १५ जखमी; पंतप्रधान मोदींकडून आर्थिक सहाय्य जाहीर

गुजरातमधील नवसारी येथे शनिवारी पहाटे एका एसयूव्हीने बसला धडक दिल्याने नऊ जण ठार झाले आणि १५ हून अधिक जण जखमी झाले.

“अहमदाबाद-मुंबई महामार्गावर, एका बस आणि एसयूव्हीमध्ये अपघात झाला. त्यात, एकूण नऊ जणांचा मृत्यू झाला आहे आणि अनेक जण जखमी झाले आहेत. हा अपघात पहाटे चारच्या सुमारास झाला,” असे पोलिस उपअधीक्षक व्हीएन पटेल यांनी सांगितले.

एसयूव्हीमध्ये प्रवास करणाऱ्या आठ जणांपैकी लक्झरी बसच्या चालकासह नऊ जणांचा जागीच मृत्यू झाला. एसयूव्हीमध्ये प्रवास करणारे हे अंकलेश्वरचे रहिवासी असून ते वलसाडहून आपल्या गावी परतत होते तर बसमधील प्रवासी मूळचे वलसाडचे होते.

पंतप्रधान मोदींनी जाहीर केले आर्थिक सहाय्य

पंतप्रधान नरेंद्र मोदी यांनी अपघातात झालेल्या जीवितहानीबद्दल दु:ख व्यक्त केले आणि प्रत्येक मृतांच्या नातेवाईकांना २ लाख रुपयांची मदत जाहीर केली.

“नवसारीतील अपघातात झालेल्या जीवितहानीमुळे दुःख झाले आहे. माझे विचार शोकाकुल कुटुंबांसोबत आहेत. मला आशा आहे की जखमी लवकर बरे होतील. पंतप्रधान राष्ट्रीय मदतनिधी कडून प्रत्येक मृताच्या नातेवाईकांना २ लाख रुपयांची मदत दिली जाईल. जखमींना ५०,००० रुपये दिले जातील,” असे पंतप्रधान कार्यालयाने ट्विटमध्ये म्हटले आहे.

केंद्रीय गृहमंत्री अमित शहा यांनी ट्विटरवर शोकाकुल कुटुंबियांप्रती शोक व्यक्त केला आहे. शहा म्हणाले, “गुजरातमधील नवसारी येथे झालेला अपघात हृदयद्रावक आहे. या दुर्घटनेत ज्यांनी आपले कुटुंब गमावले आहे त्यांच्याप्रती माझ्या संवेदना आहेत. देव त्यांना हे दुःख सहन करण्याची शक्ती देवो. स्थानिक प्रशासन जखमींवर तातडीने उपचार करत असून, त्यांच्या लवकरात लवकर बरे होण्यासाठी प्रार्थना करतो.”

गुजरातचे मुख्यमंत्री भूपेंद्र पटेल यांनी अपघातात मृत्युमुखी पडलेल्यांच्या कुटुंबीयांप्रती शोक व्यक्त केला. त्यांनी ट्विट केले की, “नवसारीतील अपघातातील दुर्घटनेने मला दु:ख झाले आहे. या दुर्घटनेत मृत्युमुखी पडलेल्यांच्या कुटुंबीयांप्रती मी मनःपूर्वक शोक व्यक्त करतो. जखमींना लवकरात लवकर बरे होण्यासाठी मी देवाकडे प्रार्थना करतो.”

Web Title: Gujarat: Navsari Yethe Bhishan Apaghatat 9 Thar, 15 Jakhami; Pantpradhan Modinkadun Arthik Sahayya Jahir