हैदराबाद- पत्नीच्या विवाहबाह्य प्रेमप्रकरणाला कंटाळलेल्या एका व्यक्तीने आत्महत्येचं पाऊल उचललं. यादाद्री भोंगीर जिल्ह्यातील शमीरपेटमध्ये राहणाऱ्या या व्यक्तीने पंख्याला गळफास घेऊन आत्महत्या केली. आत्महत्येपूर्वी या व्यक्तीने सुसाइड नोट लिहिली. यामध्ये त्याने पत्नीला ‘प्रियकराशी लग्न कर‘, असं म्हंटलं आहे. तु तुझ्या प्रियकराशी लग्न कर, ही माझी शेवटची इच्छा असल्याचं या व्यक्तीने सुसाइड नोटमध्ये लिहिलं आहे.
आचार्य वय २४ असं या व्यक्तीचं नाव आहे. पेशाने इलेक्ट्रिशन आहे. आचार्यचं उषा राणीसह दोन वर्षापूर्वी लग्न झालं होतं. या दोघांना एक वर्षांची एक मुलगी आहे. आचार्य एका खासगी फॅक्टरीमध्ये इलेक्ट्रिशनचं काम करायचा. बुधवारी आचार्य यांने त्याच्या वडिलांना मेसेज केला होता. शेजारी राहणाऱ्या श्रीकांतमुळे आपण आत्महत्या करत आहोत, असं त्याने वडिलांना मेसेज करून सांगितलं. आचार्यच्या मेसेजनंतर वडिलांना त्याला फोन करण्याचा प्रयत्न केला, पण त्यांचा फोन लागला नाही. कुटुंबातील लोक जेव्हा घरी पोहचली तेव्हा त्यांना आचार्य पंख्याला लटकलेल्या अवस्थेत आढळले.
काय आहे सुसाइड नोट मध्ये….
आचार्य यांच्या घरात सुसाइड नोट सापडली असून त्यामध्ये आचार्यने पत्नीच्या विवाहबाह्य प्रेमप्रकरणाबद्दल लिहिलं आहे,असं पोलीस अधिकारी भास्कर रेड्डी यांनी सांगितलं. आचार्य यांनी सुसाइड नोटमध्ये लिहिलं आहे,’आई-बाबा मला माफ करा. मी एक अयशस्वी व्यक्ती आहे. कुणालाही माझ्यासारखा मुलगा मिळू नये. माझी पत्नी उषा व तिचा प्रियकर श्रीकांतचं लग्न लावून द्या, ही माझी शेवटची इच्छा आहे. उषाच्या घरच्यांचा यामध्ये काहीही संबंध नाही. तसंच माझ्या आत्महत्येसाठी उषाला दोष देऊ नका, असं आचार्यने सुसाइड नोटमध्ये लिहिलं आहे. दरम्यान, आचार्यचे वडील सत्यनारायण यांच्या तक्रारीनंतर पोलिसांनी तक्रार दाखल केली आहे.
