नवी मुंबई – पनवेलमध्ये तलवारीनं वार करुन दोन महिलांची निर्घृण हत्या करण्यात आल्याची धक्कादायक माहिती समोर आली.  अज्ञातांनी  घरात घुसून सासू-सुनेची हत्या केल्याची घटना घडली आहे. दरम्यान, हत्या करण्यामागील कारण अस्पष्ट आहे.

(सविस्तर वृत्त लवकरच)

कोल्हापूर : पश्चिम महाराष्ट्रच लक्ष लागून राहिलेल्या कोल्हापुरातील शाळकरी मुलगा दर्शन शहा याच्या खून खटल्याचा निकाल जाहीर झाला आहे. खंडणीसाठी दर्शनचं अपहरण करुन खून केल्याप्रकरणी आरोपी योगेश उर्फ चारु चांदणेला सत्र न्यायालयाने जन्मठेप आणि १ लाख ५ हजार रुपये दंडाची शिक्षा सुनावली आहे. जिल्हा आणि  सत्र न्यायाधीश एल. डी. बिले  यांनी हा निकाल मंगळवारी १० ऑक्टोबर रोजी दिला.

कोल्हापूरच्या देवकर पाणंद इथे राहणारा अल्पवयीन शाळकरी मुलगा दर्शन शहाचं २५ डिसेंबर २०१२ रोजी योगेश उर्फ चारु चांदणेने अपहरण केलं होतं. दुसऱ्या दिवशी देवकर पाणंद परिसरातील विहिरीत दर्शनचा मृतदेह सापडला होता, त्याचबरोबर दर्शनच्या घरासमोर २५ तोळे खंडणीची मागणी करणारी चिठ्ठीही मिळाली होती.

पोलिसांनी घटनेचा तपास करुन चारु चांदणे या आरोपीला अटक केली होती. मार्च २०१३ मध्ये चांदणे याच्यावर न्यायालयात आरोपपत्र दाखल केलं होतं. जानेवारी २०१६ पासून या खटल्याची सुनावणी सुरु झाली. या केसमध्ये न्यायालयात ३० साक्षीदारांच्या साक्षी तपासण्यात आल्या. विशेष सरकारी वकील उज्ज्वल निकम यांनी २२ पुराव्यांची साखळी मांडली. याशिवाय परस्थितीजन्य पुरावेही मांडले. सोमवारी या खटल्यावर निकाल होण्याची शक्यता होती, त्यामुळे आरोपी चांदणेला पोलिस बंदोबस्तात न्यायालयात हजर केले होते. न्यायाधीश बिले यांनी आरोपी चांदणेला या गुन्ह्यात दोषी ठरवलं.

सरकारी वकील उज्ज्वल निकम यांनी आज परिस्थितीजन्य पुरावे महत्त्वाचे असून सुप्रीम कोर्टाचे दाखले देत दोषीला फाशीची शिक्षा देण्याची मागणी केली. परंतु न्यायालयाने फाशीच्या शिक्षेची मागणी फेटाळून लावत आरोपी चारु चांदणेला दुहेरी जन्मठेपेची शिक्षा आणि १ लाख ५ हजारांचा दंड ठोठावला. या दंडातील एक लाखाची रक्कम ही दर्शनच्या आईला देण्याचंही न्यायालयाने निकालात नमूद केलं आहे.

मुंबई: शिवसैनिकांमधील गटबाजी पुन्हा एकदा उघड झाली आहे. नगरसेविका किशोरी पेडणेकर आणि माजी शाखाप्रमुख राजेश कुसळे यांचे समर्थक एकमेकांशी भिडले.

या समर्थकांची प्रचंड हाणामारी झाली. यामध्ये दोन शिवसैनिक जखमी झाले. त्यांना उपचारासाठी नायर रूग्णालयात दाखल करण्यात आलं. पक्षसंघटनेत झालेल्या बदलानंतर अनेक दिवसांपासून हा वाद सुरु होता. तो आज हातघाईवर आला. शिवसेनेत अनेकांना पदं डावल्यानं रविवारपासून वरळी, डीलाईलरोड, भायखळा, प्रभादेवी, लालबाग परळ भागात अनेक शिवसैनिक नाराज होते. त्या नाराजीतून हा वाद उफाळून आल्याचं सांगण्यात येत आहे.

माजी मुख्यमंत्री अशोक चव्हाण यांच्या दोन्ही मुलींचे शुभदा सोसायटीमधील फ्लॅट जप्त करण्यात आले आहेत, अशी माहिती महसूलमंत्री चंद्रकांत पाटील यांनी सोमवारी पत्रकारांना दिली होती. मात्र, मुंबईच्या जिल्हाधिकाऱ्यांनी अशी कोणतीही कारवाई केली नसल्याचे स्पष्टीकरण दिल्यामुळे पाटील यांचा खोटारडेपणा उघड झाला.

भाजपचे राष्ट्रीय अध्यक्ष अमित शहा यांचे चिरंजीव जय यांच्यावर माजी मुख्यमंत्री पृथ्वीराज चव्हाण यांनी भ्रष्टाचाराचे आरोप केल्यानंतर त्याला चंद्रकांत पाटील यांनी पत्रकार परिषदेत प्रत्युत्तर दिले. पत्रकार परिषद संपल्यानंतर पाटील यांनी एक कागद दाखवून ‘अशोक चव्हाण यांनी सुखदा सोसायटीत फ्लॅट घेताना कसा भ्रष्टाचार केला आहे’, याकडे पत्रकारांचे लक्ष वेधले. आदर्श गृहनिर्माण सोसायटीतील भ्रष्टाचारामुळे मुख्यमंत्रिपद गमावावे लागलेल्या चव्हाणांवरील या नव्या आरोपामुळे सनसनाटी निर्माण झाली.

बाबूराव माणिकराव पाटील व नारायण गिरामजी पाटील या माजी आमदारांनी सुजया अशोक चव्हाण व श्रीजया अशोक चव्हाण यांना आपले वारसदार नेमून सुखदा सोसायटीत फ्लॅट दिले. अशोक चव्हाण मुख्यमंत्री असताना हा भ्रष्टाचार झाला होता. मात्र, आता दोन्ही फ्लॅट महसूल विभागाकडून ताब्यात घेण्यात आले आहेत, असे पाटील यांनी सांगताच ही ब्रेकिंग न्यूज सर्वत्र प्रसारित झाली. या बातमीची खातरजमा करण्यासाठी पत्रकारांनी मुंबईच्या जिल्हाधिकारी संपदा मेहता यांच्याशी संपर्क साधला. त्यावर ‘फ्लॅट ताब्यात घेण्याचे आदेश आमच्या कार्यालयातून निघालेले नाहीत. अशी कारवाई झाल्याची माहितीही माझ्याकडे आलेली नाही,’ असे स्पष्टीकरण त्यांनी दिले.

संभ्रम पसरवण्याचा भाजपचा डाव
अशोक चव्हाण यांच्यावर आधीच आदर्श प्रकरणी भ्रष्टाचाराचे आरोप आहेत. ११ आॅक्टोबरला होणाऱ्या नांदेड मनपा निवडणुकीच्या पार्श्वभूमीवर पुन्हा नवीन आरोप करून चव्हाणांबाबत संभ्रम निर्माण करण्याचा डाव असल्याची चर्चा राजकीय वर्तुळात व्यक्त होत आहे.

माझे फ्लॅट नियमानुसारच; अशोक चव्हाणांचा दावा
सुखदा सोसायटीमधील माझे फ्लॅट नियमानुसार आहेत. सत्ताधाऱ्यांकडून माझ्याविषयी खोट्या बातम्या पसरवल्या जात आहेत. या फ्लॅटच्या संदर्भात मुंबई जिल्हाधिकाऱ्यांनी किंवा अन्य कोणीही कारवाई केली नाही, अशी माहिती महसूलमंत्री चंद्रकांत पाटील यांनीच मला फोनवरून दिली, अशी प्रतिक्रिया माजी मुख्यमंत्री अशोक चव्हाण यांनी दिली.

मुंबई : दिल्लीपाठोपाठ महाराष्ट्रातही फटाके विक्रीवर बंदी येण्याची शक्यता आहे. मात्र, या मुद्द्यावरुन शिवसेनेमध्येच दुफळी पडल्याचं चित्र आहे. मुख्यमंत्री देवेंद्र फडणवीस यांच्याशी चर्चा करुन फटाकेविक्री याबाबत अंतिम निर्णय घेतला जाईल. अशी माहिती पर्यावरणमंत्री रामदास कदम यांनी दिली आहे.

त्याला शिवसेनेचे खासदार संजय राऊत यांनी आक्षेप घेतला आहे. ‘फटाक्यांवर अनेकांचा रोजगार अवलंबून आहे आणि फक्त भारतातच नाही तर जगात फटाके आहेत. त्यामुळे फटाकेविक्री बंद करु नका.’ असा सल्ला संजय राऊत यांनी दिला आहे. त्यामुळे शिवसेनेचे मंत्री असलेले रामदास कदम आणि संजय राऊत यांच्यात मतभेद असल्याचं पाहायला मिळत आहे.

दरम्यान, अवघ्या ८ दिवसांवर येऊन ठेपलेल्या दिवाळीची राज्यभरात जोरदार तयारी सुरु आहे. राज्यातील सर्व शाळेतील विद्यार्थी प्रदूषणमुक्त दिवाळीची शपथ देण्यात आली आहे. मंत्रालय परिसरात आज (मंगळवार) मुख्यमंत्री देवेंद्र फडणवीस, शिक्षणमंत्री विनोद तावडे, पर्यावरणमंत्री रामदास कदम यांच्या उपस्थितीमध्ये विद्यार्थ्यांना शपथही देण्यात आली.

गेल्या वर्षीची परिस्थिती टाळण्यासाठी फटाके बंदी

दिल्ली हे देशातलं सर्वात प्रदूषित शहर आहे. त्यातही दिवाळीवेळी इथल्या हवेत प्रदूषणाचा स्तर अधिक वाढतो. पंजाबी संस्कृतीत खरंतर प्रत्येक गोष्ट दणक्यात साजरी करायची पद्धत आहे. त्यामुळे दिल्लीतल्या फटाक्यांचं प्रमाण इतर शहरांच्या तुलनेत कैक पटीने अधिक असतं.  मागच्या वर्षी तर हे प्रमाण इतकं वाढलं, की शाळांना आठवड्याची सुट्टी जाहीर करावी लागली होती.

सुप्रीम कोर्टाने मागच्या वर्षी नोव्हेंबरमध्येच दिल्लीत फटाक्यांची विक्री थांबवली होती. पण मागच्या महिन्यात फटाके विक्रेत्यांनी याचिका दाखल केल्यावर ती काहीशी सैल करण्यात आली. काल शाळकरी मुलांनी कोर्टात धाव घेतल्यावर ही बंदी पुन्हा 1 नोव्हेंबरपर्यंत वाढवण्यात आली. या काळात दिल्लीतल्या हवेची चाचणी करुन फटाकेबंदीचा कितपत फायदा होतो, हे कोर्टाला तपासायचं आहे. त्यानंतर राजधानीत कायमस्वरुपी फटाक्यांवर बंदी येऊ शकते.

सुप्रीम कोर्टाच्या या निर्णयाचं पर्यावरणप्रेमी स्वागत करत आहेत. पण काहींना मात्र हे हिंदू सणांवरचं अतिक्रमण वाटत आहे. अगदी क्रिकेटर वीरेंद्र सेहवाग आणि लेखक चेतन भगत यांनीही सुप्रीम कोर्टाच्या निर्णयावर नाराजी व्यक्त केली आहे.

सुप्रीम कोर्टाच्या निर्णयातील पळवाटा

सुप्रीम कोर्टाच्या या निर्णयात अनेक पळवाटाही आहेत. हा निर्णय केवळ नॅशनल कॅपिटल रिजन अर्थात राजधानी क्षेत्रापुरताच आहे. दिल्लीच्या शेजारी वसलेल्या नोएडा, फरिदाबाद, गुडगावमध्ये हा निर्णय लागू नाही. शिवाय सध्या केवळ विक्रीवरच बंदी आहे. फटाके आधीच खरेदी करुन ठेवले असतील तर तुम्ही ते वाजवू शकता. त्यामुळे या निर्णयाचा कितपत प्रभाव दिसणार याबद्दल शंका आहे.

फटाक्यांशिवाय सण साजराच होऊ शकत नाही, अशी स्थिती बिलकूल नाही. आनंद लुटण्याऐवजी त्याचा अतिरेक केल्यानंतर कोर्टावर अशा निर्णयांची वेळ येते. त्यामुळे आता सुप्रीम कोर्टाच्या या निर्णयाचे पडसाद इतर हायकोर्टातही दिसून मुंबई-पुण्यासारखी आपली शहरं फटाकेमुक्त होणार का, याकडे लक्ष लागलं आहे.

लासलगाव़: ऐन सणासुदीच्या दिवसात जनता महागाईने त्रस्त असतांना त्यामध्ये दिवाळीच्या तोंडावरच कांदा रडवण्याची चिन्हे आहेत. दिवाळीतच कांद्याचे दर सर्वसामान्यांच्या डोळ्यात पाणी आणणार आहेत. गेल्या काही दिवसांमध्ये नाशिकच्या लासलगावमध्ये कांद्याचे दर वाढताना दिसत आहेत. दिवाळीपर्यंत हे दर आणखी वाढतील, असा अंदाज घाऊक व्यापाऱ्यांनी व्यक्त केला आहे.

मागणी आणि पुरवठा यांच्यातील तफावत वाढत असल्याने कांद्याचे दर वाढले आहेत. लासलगाव एपीएमसीमध्ये गेल्या १० दिवसांमध्ये कांद्याच्या दरांमध्ये सरासरी ८० टक्क्यांची वाढ पाहायला मिळाली आहे. सोमवारी लासलगाव कांदा बाजारपेठेतील व्यवहार सुरु होताच कांद्याचे दर २१.३३ टक्क्यांनी वाढले. शुक्रवारी कांद्याचे दर प्रति क्विंटल २,०२० रुपये इतके होते. सोमवारी कांद्याच्या दरांनी उसळी घेतली आणि ते २,४५३ रुपये प्रति क्विंटलवर जाऊन पोहोचले. घाऊक बाजारात कांद्याचे दर वाढल्याचा परिणाम काही दिवसांमध्ये किरकोळ बाजारातील विक्रीवरही पाहायला मिळेल. नाशिकमधील किरकोळ बाजारात सध्या कांद्याचा दर ३० रुपये प्रति किलो आहे. थोड्याच दिवसांमध्ये हा दर ३५ रुपये प्रति किलोवर जाऊ शकतो. त्यामुळे राज्याच्या इतर भागांसह देशभरात कांद्याचा दर ५० रुपये प्रति किलोपर्यंत जाण्याची शक्यता आहे.

‘दक्षिण भारतातून कांद्याला असलेली मागणी मोठ्या प्रमाणात वाढली आहे. त्यामुळेच नाशिकमधील घाऊक बाजारात कांद्याचे दर वाढले आहेत,’ अशी माहिती लासलगाव एपीएमसीचे अध्यक्ष जयदत्त होळकर यांनी दिली. दिवाळीच्या कालावधीत लासलगावसहित कांद्याचे व्यवहार करणाऱ्या इतर बाजारपेठा आठवडाभर बंद राहणार आहेत. त्यामुळे घाऊक बाजारातील व्यापाऱ्यांनी कांद्याचे दर वाढवले आहेत.