नवी दिल्ली – भारतीय क्रिकेट संघाचा कर्णधार विराट कोहली आणि अभिनेत्री अनुष्का शर्मा लवकरच विवाहबंधनात अडकणार असल्याचे वृत्त आहे. इटलीमध्ये ९ ते १२ डिसेंबरदरम्यान होणाऱ्या शानदार सोहळ्यात ते विवाहबध्द होणार आहेत. दरम्यान, दोघांकडून यावृत्ताला अद्याप अधिकृत दुजोरा देण्यात आलेला नाही.
नातेवाईकांची तिकीटे बुक-
विराट आणि अनुष्का या दोघांचे निकटवर्तीय विवाह सोहळ्यात सहभागी होणार आहेत. त्याकरता इटलीला जाण्याची तिकिटे बुक करण्यात आली आहेत. ९ ते ११ डिसेंबर तीन दिवस विवाह सोहळा रंगणार आहे. यात विविध कार्यक्रमांचे आयोजन करण्यात आल्याचे समजते. या विवाह सोहळ्याला बॉलीवूडसह राजकीय क्षेत्रातील मान्यवर हजेरी लावणार आहेत.
याकरता घेतली सुट्टी-
डिसेंबर महिन्यात भारतीय संघ श्रीलंकेच्या दौऱ्यावर जाणार आहे. या दौऱ्यातून वगळण्याची विनंती विराटने बीसीसीआयकडे केली होती. त्याकरता त्याने वैयक्तिक कारण सांगितले होते. या सुट्टीमागे विवाहाचे कारण असावे अशी चर्चा आहे.
