मुंबई : भाजपचे ज्येष्ठ नेते माजी मंत्री एकनाथ खडसे पक्षात नाराज आहेत. खडसेंनी राष्ट्रवादी काँग्रेसचे राष्ट्रीय अध्यक्ष शरद पवार यांची सोमवारी दिल्लीत भेट घेतली. खडसे मंगळवारी मुख्यमंत्री उध्दव ठाकरेंची भेट घेणार आहेत त्यापूर्वी खडसे माजी मंत्री पंकजा मुंडेंची भेट घेण्यासाठी त्यांच्या रॉयलस्टोन या निवासस्थानासाठी पोहोचले आहेत. त्यामुळे भाजपात भूकंप होण्याची शक्यता आहे. खडसे काय निर्णय घेतात त्याकडे सर्वांचे लक्ष लागले आहे.खडसे म्हणाले, की पक्ष उभारणीसाठी मी मेहनत घेतली. परंतु त्याच पक्षाने मला फळ काय दिले? मला पक्षात बदनाम करण्याचा प्रयत्न करण्यात आला. वेगवेगळ्या चौकशीचे आदेश दिले, कोणतेही कारण नसताना पक्षाने माझ्यावर कारवाई का केली? मात्र अशी कारवाई माझ्यावरच नव्हे तर अगोदर गोपीनाथ मुंडे यांच्यावरही करण्यात आली होती. मला स्पर्धेतून बाहेर करण्याचाही प्रयत्न करण्यात आला आहे. त्यामुळे पक्षातील अशा लोकांची मी आरती करावी काय, असा प्रश्न त्यांनी उपस्थित केला.
विधानसभा निवडणुकीत मुक्ताईनगर मतदारसंघात अ‍ॅड. रोहिणी खडसे यांना पराभूत करण्यात आल्याच्या आरोपाबाबत खडसे म्हणाले, याबाबत प्रदेशाध्यक्ष चंद्रकांत पाटील यांच्याकडे नावानिशी पुरावे, ध्वनिफिती दिल्या आहेत. आपण त्यांना हे पुरावे, नावे माध्यमांसमोर जाहीर करण्याची परवानगी मागितली होती, मात्र ती त्यांनी दिलेली नाही. खडसे पक्षामध्ये नाराज असल्यामुळे ते वेगळी भूमिका घेऊ शकतात अशी चिन्हे आहेत.
