मुंबई: हार्बर मार्गावर सीवूड-उरण लोकल सेवेसाठी आज, शुक्रवार २२ डिसेंबर ते २५ डिसेंबरपर्यंत विशेष ब्लॉक घेण्यात येणार आहे. हे काम मध्यरात्रीपासून सुरू झाले असून त्यातून फेऱ्यांवरही परिणाम होणार आहे. या ब्लॉकचा भाग म्हणून २५ डिसेंबर रोजी १३ तासांचा ब्लॉक घेण्यात आहे. त्यात सीएसएमटी ते नेरुळपर्यंत लोकल धावणार असून नेरुळपासून पनवेलपर्यंत एकही फेरी चालविली जाणार नाही. त्यामुळे हार्बरच्या प्रवाशांना त्रास सहन करावा लागणार आहे.
सीवूड ते उरण कामासाठी आज, शुक्रवार आणि शनिवार २३ डिसेंबर रोजी ३३ फेऱ्या रद्द केल्या आहेत. पण त्याऐवजी ३४ फेऱ्या चालतील. रविवारी १२ लोकल फेऱ्या करताना त्याबदल्यात २४ फेऱ्या चालतील. सोमवारी २५ डिसेंबर रोजी १३ तासांचा विशेष ब्लॉक असून १०० फेऱ्या रद्द केल्या असताना १०४ विशेष लोकल फेऱ्या चालतील. २५ डिसेंबर रोजीचा ब्लॉक दुपारी तीनपर्यंत असून त्यानंतर फेऱ्या पूर्ववत चालतील.
हार्बर मार्गावर एकूण १२ नवीन रेल्वे स्टेशन बांधण्यात येणार आहेत. त्यापैकी पाच रेल्वे स्टेशन पहिल्या टप्प्यात बांधण्याचे काम सुरू आहे. हे काम अंतिम टप्प्यात असल्याने वेगाने हे काम पूर्ण करण्यासाठी बेलापूर ते नेरूळ पर्यंतची रेल्वेसेवा तीन दिवस बंद ठेवण्यात येणार आहे. तर या तीन दिवसात नवी मुंबई ते सीएसटी दरम्यानच्या अनेक फेऱ्या रद्द करण्यात आल्या आहेत. या ४ दिवसांत सीएसटी ते नेरुळ मार्गापर्यंत रेल्वे सुरू असणार आहे. मात्र नेरुळ ते पनवेल रेल्वे सेवा ४ दिवस पूर्णपणे बंद असणार आहे. दरम्यान, बेलापूरच्या पुढे जाणाऱ्या प्रवाशांची यामुळे मोठी गैरसोय होण्याची शक्यता आहे. कारण बेलापूरच्या पुढील खारघर, मानसरोवर, खांदेश्वर आणि पनवेल या स्टेशनवरुन प्रवास करणाऱ्यांची संख्या मोठी आहे. त्यामुळे नेरूळ ते पनवेल ट्रेन पूर्णपणे बंद असल्याने प्रवाशांना त्रास सहन करावा लागणार आहे. या मेगाब्लॉकमुळे प्रवाशांचे हाल होऊ नयेत म्हणून नवी मुंबई परिवहन सेवे मार्फत नेरूळ ते बेलापूर दरम्यान अतिरिक्त बसेस चालविण्यात येणार आहेत. उरण ते उलवे दरम्यान कोणतीही दळणवळणाची साधनं नव्हती. त्यामुळे या परिसराचा पाहिजेत तसा विकास झाला नाही. शिवाय लोकही या परिसरात राह्यला येत नव्हते. त्यामुळे रेल्वेने या मार्गावर रेल्वेस्टेशन बांधण्याचा निर्णय घेतला आणि त्याचे कामही सुरू केले.
