Friday, March 29, 2024
Homeमहाराष्ट्रमुंबईकांदिवलीत मेट्रो कामगार गर्डरखाली चिरडून ठार

कांदिवलीत मेट्रो कामगार गर्डरखाली चिरडून ठार

मुंबई: मुंबईच्या दहिसर ते डी. एन. नगर मेट्रो मार्ग दोनसाठी ट्रेलरवरून नेण्यात येणारा गर्डर अंगावर पडल्यानं २५ वर्षीय कामगाराचा चिरडून मृत्यू झाला. ही दुर्घटना समता नगर पोलीस ठाण्याजवळ शुक्रवारी घडली. वाहनचालक अरमान अहमद असे मृत्यू झालेल्या कामगाराचे नाव आहे.

मुंबई उपनगरात मेट्रो मार्गाचे काम सुरु आहे. दहिसर ते डी. एन. नगर मेट्रो मार्ग दोन अ चे काम सुरू आहे. या कामासाठी ट्रेलरवरून १०० टन वजन असलेला गर्डर वाहून नेला जात होता. पश्चिम द्रुतगती महामार्गावर कांदिवली येथे पहाटेच्या सुमारास समता नगर पोलीस ठाण्याजवळ ट्रेलरची जोडणी पीन पुलरमधून तुटल्यानं गर्डर मागील वाहनावर कोसळला. त्यात वाहनचालक अरमान अहमद याचा मृत्यू झाला. अरमान अहमद हा मे. जे. कुमार या कंपनीसाठी काम करत होता.

गर्डर ट्रेलरवर सुरक्षितपणे ठेवण्यात आला नव्हता. त्यामुळं तो ट्रेलरवरून मागील वाहनावर पडला. यात मे. जे. कुमार या कंपनीसाठी काम करणाऱ्या चालकाचा मृत्यू झाला, अशी माहिती समता नगर पोलीस ठाण्याचे वरिष्ठ निरीक्षक राजू कसबे यांनी माध्यमांना दिली.

गर्डर पडला त्यावेळी इतर दोघांनी त्या वाहनातून उड्या मारल्या. त्यामुळं ते बचावले, असंही पोलिसांनी सांगितलं. या प्रकरणी ट्रेलरच्या चालकावर निष्काळजीपणाचा गुन्हा दाखल करण्यात आला आहे. या घटनेचा तपास करण्यात येत आहे, अशी माहिती पोलिसांनी दिली. यामुळे कामगारांमध्ये भीती निर्माण झाली आहे.

RELATED ARTICLES
- Advertisment -

Most Popular

Recent Comments