मुंबई: उद्योगपती, देणगीदारांनी आर्थिक मदत करू नये म्हणून माझ्या आणि राष्ट्रवादी काँग्रेसचे अध्यक्ष शरद पवारांच्या मागे ईडीची चौकशी लावण्यात आली. असा खळबळजनक गौप्यस्फोट मनसे अध्यक्ष राज ठाकरे यांनी केला.
राज ठाकरे सोमवारी मनसे पदाधिका-यांच्या मेळाव्यात बोलत होते. एमआयजी क्लब वांद्रे येथे मेळाव्याचे आयोजन करण्यात आले होते. यावेळी बोलताना राज ठाकरे म्हणाले की, ईडीची चौकशी किंवा अन्य प्रकरणात चौकशा मागे लागल्यास उद्योगपती, देणगीदार त्यापक्षाशी संपर्क टाळतात. फोनही घेत नाहीत. त्यामुळे पक्षाला आर्थिक मदत मिळत नाही, असही राज ठाकरे म्हणाले.
दोन दिवसात मनसेची उमेदवार यादी जाहीर करण्यात येणार आहे. तसंच 5 तारखेपासून प्रचाराची सुरुवात होईल. माझा आतला आवाज सांगतोय, यावेळी यश नक्की मिळेल, असा विश्वास राज ठाकरे यांनी व्यक्त केला. भाजपकडून कुठली ना कुठली चूक होईलच आणि त्यात आपल्याला यश मिळेल, असं राज ठाकरे म्हणाले.
