Friday, March 29, 2024
Homeमनोरंजनअक्षयची शहिदांच्या कुटुंबीयांना १३ कोटींची मदत!

अक्षयची शहिदांच्या कुटुंबीयांना १३ कोटींची मदत!

नवी दिल्ली – शहीद जवानांच्या कुटुंबीयांना सढळ हस्ते मदत करणाऱ्या खिलाडी अक्षयकुमारने पुन्हा एकदा आपली देशभक्ती दाखवून दिली. एका कार्यक्रमामध्ये त्यानं शहिदांच्या कुटुंबीयांना १३ कोटींची मदत केली. केवळ चित्रपटांमध्येच त्याचे देशप्रेम दिसून येत नाही तर वास्तविक जीवनातही तो वेळोवेळी देशाप्रतीचा आदर दाखवित आला आहे. या निर्णयाने सर्वस्तरातून त्याचे कौतुक करण्यात येत आहे.

नवी दिल्लीला काल अक्षय ‘भारत के वीर’ हे देशभक्तीपर गीत लॉन्च करण्यासाठी गेला होता. परंतु याठिकाणी अक्षयचे वेगळेच रूप बघावयास मिळाले. त्याने पुन्हा एकदा आपल्यातील देशभक्ती दाखवून देताना शहीद जवानांच्या परिजनांसाठी तब्बल १२.९३ कोटी रूपयांची मदत केली. याविषयीची माहिती त्याने ट्विटरच्या माध्यमातून त्याच्या चाहत्यांशी शेअर केली.

वास्तविक अक्षयने यापूर्वी शहिदांच्या कुटुंबीयांसाठी वेळोवेळी मदत दिली आहे. याच कारणामुळे अक्षयला संबंध देशातून प्रचंड प्रेम मिळत आहे. त्याचा प्रत्येक चित्रपट बॉक्स ऑफिसवर सुपरहिट ठरत असून, आगामी ‘पॅडमॅन’ही असाच करिश्मा दाखवेल अशी शक्यता आहे. दरम्यान, अक्षय सध्या त्याच्या ‘केसरी’ या चित्रपटाच्या शूटिंगमध्ये व्यस्त आहे. काही दिवसांपूर्वीच त्याने ‘गोल्ड’ या चित्रपटाची शूटिंग पूर्ण केली आहे.

अक्षय सध्या त्याच्या आगामी ‘पॅडमॅन’ या चित्रपटाच्या प्रमोशनमध्ये व्यस्त आहे. सामाजिक प्रश्नावर आधारित असलेला त्याचा हा चित्रपट ९ फेब्रुवारी रोजी रिलीज होणार आहे. सुरुवातीला हा चित्रपट २५ जानेवारी रोजी रिलीज होणार होता. परंतु संजय लीला भन्साळी यांच्यासोबतचे मैत्रिपूर्ण संबंध टिकविण्याच्या हेतूने अक्षयने त्याच्या चित्रपटाची रिलीज डेट बदलली.

अक्षय कुमारची तीसायकलही देणार समाजकार्यात योगदान

‘पॅडमॅन’ या चित्रपटात त्याने वापरलेल्या सायकलचा लिलाव करून तो ‘पॉप्युलेशन फर्स्ट’ या संस्थेला आर्थिक सहकार्य करणार आहे.  महिलांच्या आरोग्याच्या दृष्टीने आवश्यक असलेले सॅनिटरी नॅपकिन स्वस्तात बनवण्याचं तंत्र शोधून काढणारे आणि खेडोपाडी जाऊन महिलांमध्ये सॅनिटरी नॅपकिनबाबत जागृती करणारे सामाजिक कार्यकर्ते पद्मश्री अरुणाचलम मुरुगनानथम यांचा प्रेरणादायी प्रवास ‘पॅडमॅन’ या चित्रपटात आहे. त्यात अरुणाचलम यांची भूमिका अक्षय कुमारनं साकारलीय. अरुणाचलम यांच्या आयुष्यात त्यांची सायकल हा अविभाज्य भाग राहिलाय. म्हणूनच, या चित्रपटाच्या पोस्टर आणि ट्रेलरमध्ये अक्षय एका सायकलवर बसलेला पाहायला मिळतोय. स्वाभाविकच, या सायकलला वेगळं महत्त्व, वलय प्राप्त झालंय. त्याचाच फायदा सामाजिक कार्यासाठी करून घ्यायचं अक्षय आणि ट्विंकलनं ठरवलंय. ‘पॅडमॅन’ चित्रपटात वापरलेल्या सायकलचा लवकरच लिलाव होणार आहे. त्यातून जो निधी मिळेल, तो ‘पॉप्युलेशन फर्स्ट’ या स्वयंसेवी संस्थेला दिला जाईल. ही संस्था गेली अनेक वर्षं महिलांच्या आरोग्याबाबत काम करतेय. १०१ गावांमध्ये त्यांच्या कार्याचा विस्तार आहे. त्यांचं काम पाहून अक्षय – ट्विंकल प्रभावित झाले आणि त्यांनी या संस्थेला मदत करण्यासाठी लिलावाचा आगळा फॉर्म्युला ठरवला.

पॅडमॅनच्या प्रदर्शनाची तारीख बदलली!

दरम्यान, बहुचर्चित ‘पद्मावत’ हा सिनेमा येत्या २५ जानेवारीला प्रदर्शित करण्याचा निर्णय निर्मात्यांनी घेतल्यानंतर, ‘पॅडमॅन’च्या प्रदर्शनाची तारीख पुढे ढकलण्यात आली आहे. आधी ‘पॅडमॅन’ही २५ जानेवारीलाच प्रदर्शित होणार होता, पण आता तो ९ फ्रेबुवारीला रसिकांच्या भेटीला येणार आहे. त्यामुळे दोन्ही सिनेमांचा बॉक्स ऑफिसवरचा संघर्ष टळलाय. संजय लीला भन्साळी यांच्या विनंतीवरून अक्षयने ‘पॅडमॅन’चं प्रदर्शन पुढे ढकललंय. पद्मावतला सिनेमा लवकर प्रदर्शित करण्याची जास्त गरज आहे, हे ओळखून हा निर्णय घेतल्याचं अक्षयनं सांगितलं. ९ हा अक्षयचा ‘लकी नंबर’ असल्याचं बोललं जातं. त्यामुळे त्याच्या ‘लकी’ तारखेला प्रदर्शित होणारा पॅडमॅन बॉक्स ऑफिसवर कशी कमाल करतो, हे पाहणं औत्सुक्याचं आहे.

RELATED ARTICLES
- Advertisment -

Most Popular

Recent Comments