मुंबई : आम्ही १५ कोटी आहोत. पण १०० कोटींना भारी पडू या चिथावणीखोर विधानाविरोधात एमआयएमचे नेते माजी आमदार वारिस पठाण यांच्याविरोधात अंधेरी पोलीस ठाण्यात तक्रार दाखल करण्यात आली आहे. संघर्ष सामाजिक संस्थेचे पृथ्वीराज म्हस्के यांनी तक्रार दिली आहे.
भायखळ्याचे माजी आमदार वारिस पठाण यांनी १५ फेब्रुवारीला कर्नाटकातल्या गुलबर्गामध्ये भाषण केलं. या सभेचा व्हिडीओ सोशल मीडियावर व्हायरल झाला आहे. जी गोष्ट मागून मिळत नसेल, ती हिसकावून घ्यावी लागेल. ती वेळ आलेली आहे. आम्ही माता, भगिनींना पुढे करतो, असं ते म्हणतात. फक्त सिंहिणी बाहेर पडल्या आहेत आणि तुम्हाला घाम फुटला आहे. आम्ही सुध्दा बाहेर पडलो तर काय होईल याचा विचार करा. असं वादग्रस्त विधान वारिस पठाण यांनी केलं होतं.
संघर्ष सामाजिक संस्थेचे पृथ्वीराज म्हस्के यांनी माजी आमदार वारिस पठाण यांच्याकडे पोलीस आयुक्त, सहपोलीस आयुक्त (कायदा आणि सुव्यवस्था), झोन १० चे पोलीस उपायुक्त यांच्याकडे तक्रार केली आहे.
