मुंबई : भाजपाला राज्यपाल भगतसिंह कोश्यारी यांनी सत्ता स्थापनेसाठी निमंत्रण दिले आहे. राज्यपालांनी फडणवीस यांना ११ नोव्हेंबर सोमवारपर्यंत बहुमत सिद्ध करण्यासही सांगितलं आहे. यामुळे आज रविवारी भाजपच्या कोअर कमिटीच्या बैठकीत भाजप सत्तास्थाण्याचा निर्णय घेणार आहे. अशी माहिती भाजपा नेते सुधीर मुगंटीवार यांनी दिली.
राज्यपालांकडून भाजपाला यासंदर्भात पत्र पाठवण्यात आलं आहे. राज्यपालांकडून आलेल्या पत्रावर आज भाजपच्या कोअर कमिटीत निर्णय होणार आहे. राज्यपालांनी निमंत्रण देणं हा घटनात्मक प्रक्रियेचा भाग आहे, असेही त्यांनी म्हटलं आहे.
१३ विधानसभेची मुदत शनिवारी मध्यरात्री संपुष्टात आली. मुख्यमंत्री फडणवीस यांनी शुक्रवारी पदाचा राजीनामा राज्यपाल भगतसिंग कोश्यारी यांच्याकडे सादर केला. तर राज्यपालांनी पुढील व्यवस्था होईपर्यंत काळजीवाहू मुख्यमंत्री म्हणून जबाबदारी पार पाडण्याची सूचना फडणवीस यांना केली होती.
शिवसेनेच्या भूमिकेमुळे भाजपला सत्तास्थापन करण्यात अडचण निर्माण झाली आहे. त्यामुळे भाजप सत्तास्थापन करण्याचा दावा करणार की नाही आज भाजप त्याबाबत बैठकीत निर्णय घेण्याची शक्यता आहे. त्यामुळे भाजपच्या निर्णयाकडे सर्वांच्या नजरा लागल्या.
