व्यंगचित्राच्या ‘टीकेनंतर’ बदल घडेल का?

मनसे अध्यक्ष राज ठाकरे यांनी फेसबुक पेज लाँच केले त्या दिवसापासून चर्चेचा विषय झाला आहे. ठाकरे हे आपल्या व्यंगचित्रातून फटकारे देण्याचे काम करत आहेत. पुन्हा एकदा व्यंगचित्रातून भाजप आणि पंतप्रधान नरेंद्र मोदींवर निशाणा साधला आहे. सोशल मीडियावरील ‘परतीचा पाऊस’ भाजपसाठी तापदायक ठरत असल्याचा टोला या व्यंगचित्राच्या माध्यमातून लगावण्यात आला आहे, यामुळे सोशल मीडियावर चर्चेचा विषय ठरत आहे. राज ठाकरे यांनी काही दिवसांपूर्वी सोशल मीडियाच्या वापरावरुन भाजपवर टीका केली होती. लोकसभा निवडणुकीत भाजपने जे पेरले तेच आता उगवले आहे. खोटी माहिती पसरवण्यासाठी आणि लोकांची मने कलुषित करण्यासाठी भाजपने सोशल मीडिया नावाचे अस्त्र वापरले, तेच आता त्यांच्यावर बुमरँग झाले आहे, असे राज ठाकरेंनी म्हटले होते. पेट्रोल- डिझेलचे वाढते दर, महागाई, आश्वासनांची पूर्तता करण्यात येणारे अपयश यामुळे मोदी सरकारविरोधात देशभरात नाराजी आहे. सोशल मीडियावरही याचे पडसाद दिसत आहेत. या पार्श्वभूमीवर राज ठाकरे यांनी व्यंगचित्र रेखाटले आहे. ‘परतीचा पाऊस’ असे या व्यंगचित्रात म्हटले असून सोशल मीडियावरील टीकेने अमित शहा, नरेंद्र मोदी आणि अरुण जेटली यांची बिकट अवस्था झाल्याचे या व्यंगचित्रात रेखाटण्यात आले आहे. खरतर या सर्व विषयांची चर्चा होत राहिल. विरोधकांनी सरकारच्या चुकीच्या धोरणांचा विरोध करणे लोकशाहीमध्ये गैर नाही. माध्यमांनीही जे सरकार असते त्या सरकारच्या विरोधात नेहमी भूमिका ठेवली पाहिजे. सरकार चांगली कामे करत असेल तर त्याचे कौतुकही करायला हवेच. परंतु चुकीचे काम करत असेल तर त्याचे वाभाडेही काढायला मागे पुढे राहाता कामा नये. मोदी सरकार चुकीचे काम करत आहेत. सरकार बद्दल लोकांच्या मनात रोष आहे. असा आरोप विरोधी पक्षातील नेत्यांकडून होत असतो. आरोप प्रत्यारोप होत असतात, परंतु त्याचा काहीही परिणाम होतांना दिसत नाही. परिस्थिती सुधारली जात नाही. मनसे अध्यक्ष ठाकरे हे व्यंगचित्राच्या माध्यमातून सत्य परिस्थिती समोर मांडत आहेत. त्यांच्या त्या व्यंगचित्रातून जनमानसात एक वेगळा संदेशही चालला. पण परिस्थिती सुधारेल का? आणि सरकारला थोडी जरी शिल्लक उरली असेल तरी त्यांनी स्वत:मध्ये बदल घडवावेत. व जनतेला अच्छे दिन दाखवावेत.