वाहतूक नियमांचा भंग केल्यास वाहनधारकांना आज १ सप्टेंबरपासून अधिक दंड भरावा लागणार आहे. वाढते रस्ते अपघात रोखण्याचा उपाय म्हणून दंडाच्या रकमेत ही वाढ झाली आहे. नव्या मोटार वाहतूक कायद्यातील ६३ तरतुदी लागू करण्यासंदर्भात केंद्र सरकारने अधिसूचना काढली आहे. यामुळे नियम तोडणा-यांना चांगलाच फटका बसणार आहे.
संसदेच्या दोन्ही सदनात मोटार वाहतूक दुरुस्ती विधेयक संमत करण्यात आले होते. त्यामुळे वाहतूक नियमांचा भंग केल्यास आकारला जाणारा दंड आता भरघोस वाढवण्यात आला आहे. यात कमीत कमी म्हणजे ५०० रुपये दंड हा रस्ते नियम तोडण्यासाठी असून जास्तीत जास्त म्हणजे २५ हजार रुपये दंड आणि तीन वर्षांचा तुरुंगवास हा अल्पवयीन मुला-मुलीने वाहन चालवून गुन्हा केल्यास मालक वा पालकाला भोगावा लागणार आहे.
परवाना नसताना वाहन चालवल्यास होणारा दंड ५०० रुपयांवरून ५ हजार रुपये केला गेला आहे. मर्यादेपेक्षा वेगाने वाहन चालवल्यास आता ४०० रुपयांऐवजी २ हजार रुपये दंड आकारला जाईल.
कायमस्वरूपी चालक परवाना मिळवण्याची प्रक्रियाही अधिक कडक करण्यात आली आहे. रुग्णवाहिकेला वाट मोकळी करून न दिल्यास १० हजार रुपये दंड आकारला जाणार आहे.
नियमभंग : जुना दंड : नवा दंड (आकडे रुपयात)
रस्ते नियमांचा भंगः 100 : 500
प्रशासनाचा आदेश भंग : 500 : 2000
परवाना नसलेले वाहन चालवणे: 500 : 5000
पात्र नसताना वाहन चालवणे : 500 : 10,000
वेग मर्यादा तोडणे : 400 : 2000
धोकादायक वाहन चालवणे : 1000 : 5000
दारु पिवून वाहन चालवणे : 2000 : 10,000
वेगवान वाहन चालवणे : 500 : 5000
विना परवाना वाहन चालवणे : 5000 : 10,000
दुचाकीवर दोन पेक्षा जास्त व्यक्ती : 100 : 2000
विमा नसताना वाहन चालवणे : 1000 : 2000
