मुंबई: बॉलिवूडची अभिनेत्री श्रीदेवीचं हृदयविकाराच्या धक्क्यानं निधन झालं. श्रीदेवीच्या आकस्मिक निधनानं संपूर्ण बॉलिवूडवर शोककळा पसरली. शाहरुखच्या आगामी ‘झिरो‘ चित्रपटात श्रीदेवी दिसणार असून या चित्रपटात श्रीदेवीनं पाहुण्या कलाकाराची भूमिका साकारली आहे. श्रीदेवीचा हा शेवटचा चित्रपट असणार आहे.
दुबईत लग्नसोहळ्यासाठी गेलेल्या श्रीदेवीचं शनिवारी मध्यरात्री निधन झालं. बॉलिवूडची ‘चाँदनी’ म्हणून प्रसिद्ध असलेल्या श्रीदेवीनं ‘सोलवां सावन’ या चित्रपटातून बॉलिवूडमध्ये पदार्पण केले होते. पाच वर्षांनतर आलेल्या ‘हिम्मतवाला’ या चित्रपटाने श्रीदेवीला अभिनेत्रीची खरी ओळख करून दिली. श्रीदेवीने हिंदी आणि तमिळ चित्रपटासोबतच मल्ल्याळम, तेलुगु आणि कन्नड चित्रपटात काम केले.
शाहरुखच्या आगामी ‘झिरो’ या चित्रपटात श्रीदेवीची पाहुण्या कलाकाराची भूमिका आहे. हा एक पार्टीचा सीन असून त्या ठिकाणी शाहरुख, आलिया भट्ट आणि करिष्मा कपूरसोबत श्रीदेवी चाहत्यांना दिसणार आहे. शाहरुखच्या ‘झिरो’ हा चित्रपट श्रीदेवीचा अखेरचा चित्रपट ठरणार आहे.
